þriðjudagur, 23. desember 2008

Óska...

...þeim örfáu hræðum sem nenna að fylgjast með stopulum og arfaslökum innslögum geimverunnar gleðilegrar hátíðar.
Njótið óhófsins.
Skál!!!

laugardagur, 20. desember 2008

Hef...

...Deezu frænku grunaða um að vera haldin fordómum gagnvart fólki sem er ekki sömu skoðunar og hún. Hún er allavega búin að loka fyrir athugasemdir hjá sér.
Síðan var spurning um að ræða verð á bleyjum. Veit samt ekki hvernig. Þarf að hugsa þetta betur.
Bulla floggið hveður.
Skál!!!

sunnudagur, 14. desember 2008

Ætlaði...

...að mótmæla í dag. Fattaði fimm mínútur í þrjú að ég bý ekki lengur í miðbænum.
That's how this seatrip ended!
Skál!!!

föstudagur, 12. desember 2008

Bulla...

...floggið þennan föstudaginn átti að snúast um tiltekið atriði en atvik undanfarinna daga hafa ollið því að allt það sem átti að festa í letur þetta kveldið er horfið veg allrar veraldar, veraldar sem er horfin veg allrar veraldar, sem er horfin veg allrar veraldar...
Jú...man...
Yfirvald meltingarkerfis kroppsins míns ákvað fyrri hluta þessarar viku að afnema bindiskylduna. Olli yfirnáttúrulegum niðurgangi. Held að á enskri líkamshagfræði sé þetta kallað 'liquidity'. Gegnumstreymi gjaldmiðla líkamans óheft.
En engar áhyggjur. Geimveran hefur sett viðeigandi höft á flæðið, étið ekkert nema pappír í nokkra daga. Trefjar eru útflæðishöft þarmmiðilsmarkaðsins.
Piff... Var einhvern veginn allt miklu meira sniðugt þegar mar hugsaði þetta. Kannski verður mar að vera atvinnubloggari til að geta komið hlutunum frá sér.
Hljómar meira eins og eitthvað plan sem yfirstjórn landsins hafi sett saman.
Best að hafa samband við Stebba Fr. Fá nokkra góða punkta hjá kallinum.
Skál!!!

miðvikudagur, 10. desember 2008

Dagurinn...

...sem (g)uð gleymdi!
Skál!!!

laugardagur, 6. desember 2008

Fulla...

...bloggið þessa helgina snýst bara um eitt.
Ég ætti að vera æpandi brjálaður út af öllu ruglinu sem er í gangi hérna. Ruglið er hins vegar svo yfirgengilegt að mar situr orðlaus. Orðlaus. Orðlausari en fámáll maður að eðlisfari (utan þeirra stunda sem kjálkaolían hefur verið notuð óspart) getur orðið.
Og með hverjum deginum (já, ég veit að það má ekki byrja setningu á samtengingu) verður mar orðlausari.
Lánið liggur kannski í því að geta horft í athugul augu afkvæmisins. Augu sem segja manni að þetta sé ekki svo nojið.
Skál!!!
P.S. ókei, kannski ekki alltaf svo fámáll.

þriðjudagur, 2. desember 2008

Handviss...

...um að dóttir mín veit meira en hún vill láta vera.
Skál!!!

föstudagur, 28. nóvember 2008

Baunir...

...eru baunum bestar.
Eða var það verstar.
Nei, geimveran heldur bestar.

Baunin mín og baunin þín,
ekki baunir Ora.
Baun er baun ef sólin skín,
baun er þeirra er þora.

Skál!!!

p.s. fólk verður bara að giska á laglínu eftir takti leirburðarins.

þriðjudagur, 25. nóvember 2008

Klukkið...

...liggur á geimverunni eins og mara, klafi sem hún er upptekin við að leiða hjá sér, svo upptekin að hún hefur ekki einu sinni tíma til að hanna og búa til vúdúdúkku af Deezunni sem kom þessu helvítis bloggkeðjubréfi á geimveruna, jafn ógeðslega pirrandi og öll keðjubréfin sem geimveran sleit í æsku.
En geimverunni tekst þetta.
Skál!!!

mánudagur, 24. nóvember 2008

Svimaði...

...í alvöru þegar ég las þetta. Sérstaklega voru síðustu málsgreinarnar einstaklega ruglandi.
Ruglið er alveg yfirgengilegt!
Skál!!!

sunnudagur, 23. nóvember 2008

Hamingjan...

...er tálsýn!

Skál!!!

sunnudagur, 16. nóvember 2008

Akkuru...

...líst mér svona vel á þennan gauk (utan þeirrar staðreyndar að hann reykir og hefur viðurkennt að hann hafi notað ólögleg vímuefni, í stað þess að segjast ekki hafa andað að sér eða borið fyrir sig minnisleysi með þögn)?

Eina sem stakk mig var 'tyranny' utanaðkomandi orkugjafa. En látum það liggja á milli hluta.
Minnir doltið á þetta og vekur mann til umhugsunar um vanvitana sem sitja í valdastólum Klakans í dag.

Djöfull vantar einhvern í bílstjórasætið í dag sem er til í að taka í stýrið, í stað þess að horfa á það skelfinug lostinn og segja að óútreiknanlegar hreyfingar þess séu einhverjum öðrum að kenna.
*Skál*
P.S. Að sjálfsögðu ber að geta heimilda: Þetta er tekið af Freedomfries-blogginu á Eyjunni. Nenni ekki að setja upp heimildaskrá. Ber fyrir mig Hannes!

laugardagur, 15. nóvember 2008

Brauðið...

...heppnaðist í þetta skiptið! Írskt súrmjólkurbrauð, hvorki meira né minna.
Geimveran er samt miður sín yfir því að það hafi verið komið í ofninn fyrir hádegi á laugardegi.
Greinilega ellimörk anda og efnis þegar bæði heimta að risið sé úr rekkju á svo ósatanískum tíma um helgi.
Skál!!!

fimmtudagur, 13. nóvember 2008

Fylgni

Djöfull hef ég það sterklega á tilfinningunni að eftir því sem vanvitaskapurinn í yfirstjórn landsins er meiri þeim mun fleiri vanvitar sitji undir stýri.
Svo er líka doltið líkt með þessum mismunandi staðsettu vanvitum, báðir sitja og stýra stórum hlutum sem þeir ráða ekkert við og setja saklausa gangandi vegfarendur í stórhættu.
Ó mig auman!
Skál!!!

laugardagur, 8. nóvember 2008

Jóhannes...

...skírari er sem betur fer ekki á meðal vor. Hann myndi örugglega vilja drekkja ósjálfbjarga dóttur geimverunnar í á á morgun. (tisk, á* kom tvisvar sinnum fyrir án milliorðs).
Við lifum hins vegar á þeim tímum að drekkingar þurfa ekki að vera í dýpra vatni en örfáir sentímetrar, og barnið þar að auki nokkuð ofan vatns.
Geimverunni er verulega létt.
Skál!!!
P.S. *Hvað þýðir þessi setning?: á á á á á á.

P.S.S Bjór í verðlaun fyrir þann sem fyrstur fattar (kommentar, það er). Hástöfum vísvitandi haldið leyndum, myndu segja of mikið.

þriðjudagur, 4. nóvember 2008

Lýsandi...

...dæmi um gatnakerfi og skipulagsmál í Kópavoginum.
Geimveran fór í þrítugsafmæli hjá Hörpu frænku sinni á föstudeginum. Teitið var haldið í Hlíðarsmára í títtnefndum Kópavogi, sem sumir vilja nú meina að heiti í rauninni Kópaskarð. Sossum ekki í frásögur færandi. Þrusupartí með miklu stuði, eins og Hörpu einni sæmir.
Málið er hins vegar, eins og áður sagði, skipulag og gatnagerð í Kópavogi. Þegar aldin geimveran hafði fengið nóg og vildi halda heim á leið um miðnættið villtist hún. Ráfaði svo um næsta sólarhringinn þar til hún endaði í sextugsafmæli á Feitutáarstræti, rangnefnt af innfæddum sem Digranesvegur.
Svo heppilega vildi til að hér var um sextugsafmæli móður sambýliskonu geimverunnar. Geimveran gat því safnað kröftum með fingramat og veigum fyrir næstu tilraun í að brjótast út úr völundarhúsinu.
Sem betur fer fékk hann far með innfæddum kópaskarðsbúa sem flutti búferlum út á land, og það ekkert smá út á land, alveg útí hraun, á Vellina, rétt utan Hafnarfjarðar, eins og Hafdís frænka geimverunnar vill meina.
Þessum hrakförum vill geimveran kenna um heldur óhrjálega líðan sína sunnudaginn eftir. Ekki þeirri augljósu staðreynd að hún er dottin úr allri drykkjuæfingu.
Gæti annars lagst í barlóm eins og stór hluti mörlandans. Hef hins vegar lúmskt gaman af því að láta taka mig í ósmurðan óæðri endann.
Skál!!!
P.S. Akkuru í andskotanum er háttvirt rassgatið á manni kallað óæðri endinn? Hvaða ginsnobbari ákvað það? Hef það meira segja fyrir satt að stjarnan sé minni gróðrastía fyrir bakteríur og viðbjóð en títtnefndur trantur.

fimmtudagur, 30. október 2008

NEI!!!!!!!!!!!!

Hvurs konar framkoma er þetta? Á mörlandinn ekki einu sinni að geta drekkt sorgum sínum í sæmilega drekkanlegu áfengi? Erum við að tala um að mar þurfi að fara drekka landa? Illa bruggaðan í plastbrúsa?
Nei. Nei. NEI!
Nú og ef svo fer þá þekki ég fólk sem kann þann gjörning að brugga góðan landa. Þannig að ég slepp vonandi við brunabragðið.
Skál!!!

miðvikudagur, 29. október 2008

Hjalið...

...og stöðugur viðreksturinn í dóttur geimverunnar er nokkurn veginn það eina sem heldur sönsum í geimverunni. Ef ekki væri um það að ræða væri geimveran farin niður í bæ að leita sér að leppalúðum að berja. Leppalúðum sem hefur greinilega færst fullmikið í hendur, tekið að sér verkefni sem þeir ráða ekki við, en hafa náð að þyrla upp nógu ryki til að fela vanhæfni sína svo árum skiptir.
Audda hefði mar átt að sjá í gegnum þetta en ætli mar hafi bara ekki viljað trúa því frekar að það gengi allt bara vel, fólk væri að standa sig í bísness og svona og þetta væri allt undir stöðugu og góðu eftirliti.
En allavega. Bakaði brauð í morgun, írskt súrmjólkurbrauð, sko mínus vínsteinn (creme de tartar). Kauðslegara kvikindi hefur varla sést hnoða í deig. Tókst þó fyrir rest og þetta leit líka svona vel út í ofninum, þessi líka vel lagaði hleifur. Alveg var hleifurinn jafnfallegur þegar hann var settur á grindina til kælingar.
Bragðprufur tókust með ágætum, allavega við ystu sneiðarnar. Hins vegar reyndist kvikindið vera óbakað í miðjunni, bara pjúra deig þar. En svo lærir sem lifir. Næst verður hitinn bara lækkaður lítið eitt og brauðið látið damla lengur. Kannski spurning um að sleppa blæstrinum, þótt mar tími því varla, svona þegar mar getur valið það til að byrja með.
Blástursofn! Hver hefði trúað því að mar ætti eftir að búa yfir svoleiðis kraftaverki!
Og hvernig í ósköpunum kemst allt þetta loft fyrir í svona litlum búk? Get svo svarið það að stúlkan er að ná föður sínum í viðrekstrinum.
Skál!!!

þriðjudagur, 21. október 2008

Yfirdrifnara...

...verður það varla!
Facebook færir þér mátt til að deila og gerir heiminn okkar opnari og samtengdan
Spurning um að fara ráða einhvern verkstjóra og yfirlesara á þetta þýðingarsamstarfsverkefni þarna á Fésinu. 'Færir þér mátt til að deila!' Fyrr má nú aldeilis! Akkuru færir þetta manni bara ekki mátt til að drottna og deila, eða var það deila og drottna? Mar bara spyr sig. Ætla svo ekki að tjá mig um síðari hluta þessarar setningar. Hún talar fyrir sig sjálf!
Ótrúlegt hvað reynt er að ljúga að manni í fjölmiðlum þessa lands. Bogi Ágústs að taka viðtal við danska kvikmyndaleikstýru.
Nei sko! Konur kunna ekkert að leikstýra, hvað þá ef þær eru danskar.
Nei, hér er greinilegt að ríkisstjórnin er að nota ríkisfjölmiðilinn til að dreifa athygli okkar frá hinum raunverulegu vandamálum dagsins í dag; Einokun ríkisins á áfengis- og vímuefnasölu og ótrúlega vanhæfni stjórnenda strætó.
Er alveg miður mín yfir þessu.
Skál!!!

Djöfullinn!!!

Það var eitthvað sem ég ætlaði svoleiðis að kvarta yfir en er nú búinn að steingleyma hvað er.
Ohh jæja. Það kemur örugglega til með að hrjá mig aftur. Og þá verður sko kvartað!
Skál!!!

laugardagur, 18. október 2008

Hausinn...

...á mér var í dag svo uppfullur af sjitti sem mig vantaði að pirra mig á. Svo loxins sest mar fyrir framan skjáinn og þá er hann jafn tómur og gjaldeyrissjóður landsins, hausinn, það er, og skjárinn þá næstum því líka.
En Grímur, bróðir geimverunnar, kom þó með geislann sem lýsti upp tilveruna í dag. Þótt ég sé auðvitað ekki að gleyma gerseminni sem úgglar og gúgglar gleði í kringum sig. :)
Allavega kom drengurinn með hugmynd vikunnar. Auðvitað á ekkert að rífa þessar spíttverksmiðjur sem er verið að bösta. Á þessum síðustu og verstu á notturlega að þjóðnýta svoleiðis. Þjóðnýta og stækka. Fáranlegar upphæðir sem hægt er að safna í gjaldeyri með útflutningi vímuefna.
Markaðsstarfið er löngu hafið. Á árum geimverunnar á Næsta bar var einmitt verið að tala um viðskiptatækifæri með Íslandsræktað maríjúana, vörumerki og þess háttar. Man reyndar bara eftir Austfjarðarþokunni, en fleiri góð voru nefnd til sögunnar. Spíttið gæti þá verið t.d. nefnt Strikklotan eða Baugar.
Annars er geimveran að fara taka slátur á morgun. Allt gert til að draga úr áhrifum kryppunnar. Kannski að hægt sé að selja líka eitthvað af þessu til að draga úr áhrifum kreppunnar.
En nú er geimveran bara farin að bulla. Best að láta staðar numið.

Barlómur og eintómt bull sem bylja á eyrum dag og nótt, bráðum valda bólgu og sótt og gengisfelldum sull. Sem betur fer er vor belgur sver, hann ber oss fram í desember. Þá jólaljóð og eplin rjóð kæta vora þjóð. Eða ekki.

Skál!!!

föstudagur, 10. október 2008

Leirburður

Með tóman pung hann töltir hýr
og trallar dægrin löng.
Lánalínu þarf sá fýr
eða ljúfa kreditspöng.

Yfirdráttur, skuldabréf,
víxill eða tékki,
skuldabaggi, lánaþref,
hver þekkir'ett'ikki!

Höfundur:
Skuldaklafinn

Skál!!!

Innhverfan...

...kom í veg fyrir að ég gæti farið í útrás. Og svo kemur hún einnig í veg fyrir að ég geti skriðið inn í skelina og gleymt óförum annarra.
Ó mig auman!
Skál!!!

fimmtudagur, 9. október 2008

Það...

...er ekki miklu við orðavaðal síðustu daga að bæta.
Jú, kannski einu.
Skál!!!

mánudagur, 6. október 2008

Fyrst frétt mbl.is...

...af ávarpi forsætisráðherra.
'Geir H. Haarde, forsætisráðherra, flytur sjónvarpsávarp til þjóðarinnar.

hver þjóð hugsar um sinn eigin hag. Skuldbindingar þeirra nema margfaldri þjóðarframleiðslu Íslands. Hamfarir ríða. Stærð bankanna þeirra helsti veikleiki.
'

Mar fellur í öngvit yfir þessari stjörnublaðamennsku.

Skál!!!

Viðbragðsflýti...

...markaðsdeildar RÚV er ótrúleg. Búin að selja slatta af auglýsingum fyrir ávarp forsætisráðherra. Nánast eins og upplýsingum um tímasetningu ávarpsins hafi verið lekið fyrir löngu í yfirmenn markaðsdeildarinnar.
Auðseljanlegra auglýsingapláss er varla til, nema þá fyrir áramótaskaupið. Og við...ööö Ríkið græðir.
Skál!!!

laugardagur, 4. október 2008

8 mínútur...

...er kannski langur tími í pólitík. Aftur á móti getur þessi stutta stund verið gulls ígildi fyrir kviðvöðva heimsins.
Jútjúbaði þetta frábæra myndband. Geimveran kallar þetta myndband því á því formi kom þetta út.
Nú gæti einhver spurt sig hvernig geimveran býr yfir þessum upplýsingum.
Jú, geimveran eyddi einu ári í Bellevue, úthverfi borgarinnar Seattle í Washington-fylki í Bandaríkjum Norður-Ameríku. Eftir nokkurra mánaða dvöl var miðbik geimverunnar farið að þenjast helst til mikið út að framan. Greip því geimveran til þess örþrifaráðs að verða sér út um eintak af átta-mínútna-kviðvöðvum gegn vægri greiðslu.
Viti menn, eftir nokkrar lotur fyrir framan imbann fór þetta að bera árangur. Hver hefði trúað því að líkamleg hreyfing gæti grennt mann.
Því miður misfórst myndbandsspólan þegar heim var haldið. En aldrei þessu vant hefur internetið komið geimverunni að gagni. Þessi gimsteinn fortíðarinnar er kominn í leitirnar og þar með er geimveran lögst í gólfið á ný.
Endilega nýtið ykkur líka. Kostar minna en kort í ræktina.
Njótið!

Skál!!!
P.S. Það er með vilja gert að skilja eftir mynd af geimverunni löðursveittri á vömbinni fyrir framan örskjá fartölvunnar að herða á kviðnum í huga þeirra er þetta lesa.

miðvikudagur, 1. október 2008

Miskild'etta...

...eitthvað. Skaut skelk í bringu. Gaurinn lá bara í blóði sínu eftir það. Er á flótta undan fjársveltri réttvísinni. Það reddar manni að þeir leggja áherslu á leit í þeim lögregluumdæmum sem eru vel sett fjárhagslega. Þess vegna ætti ég að geta sinnt litlu geimverunni í einhvern tíma hérna á höfuðborgarsvæðinu. Verð samt að fylgjast með umræðum um fjárlög.
Skál!!!

þriðjudagur, 30. september 2008

Ef...

...gúrkur geta verið súrar eru þá tómatar ekki stundum svekktir? Hmmm... Súrar gúrkur, svekktir tómatar! Bók, bíómynd, gjörningur, vísindaleg tilraun. Passar ekki. Dettur helst í hug að sultaðir tómatar geti verið doltið svekktir. Ekki gott að segja.
Held annars að ég sé með of lítil augu fyrir flatskjái. Það er annað hvort það eða þá að ég sit of nálægt honum.
Og hvað er málið með þetta væl yfir peningum í dag? Hver milljarðamæringurinn á fætur öðrum veinar eins og grís stunginn af Dabba sækó. Það er ekki eins og þessir peningar þeirra hafi verið til, bara tölur á blaði, ef þær komust þá nokkurn tíma af tölvuskjánum.
Svo er líka spurning hvort Glitnir hefði ekki getað reddað sér út úr þessu babbi með því að biðja Bjarna sinn fyrrverandi Ármannsson að skila einhverjum af milljörðunum sem hann gekk út með, í stað þess að gefa svona færi á sér.
Allavega þá er mikið um súrar gúrkur og svekkta tómata á meðal peningamanna í dag.
Skál!!!

mánudagur, 29. september 2008

Suðurbrautin...

...telst hér með til upplýsingahraðbrautar, ekki bara bílahraðbrautar.
Eftir óratíma komst Talsamband á við umheiminn og um leið ákvað Tjess að athuga hvort ekki sé hægt að kreista úr svartholi sálarinnar örlítið meiri biturð.
Fyrst langar mig til að kvarta yfir þjónustunni hjá Tali, svona fyrst að netsambandið datt inn í dag. Tók þetta fyrirtæki ekki nema 12 eða 13 virka daga að koma netinu í gang. Þótt loforð hefði verið gefið um að það tæki ekki nema 2 til 10 virka daga, breyttist reyndar í 5 til 10 síðasta föstudag.
Ef einhver ætlar sér í viðskipti við Tal þá látið þetta lið skrifa upp á að þetta taki þann tíma sem Talað er um.
Annars er geimveran í orlofi sem eytt er í að annast afkvæmið. Svei mér þá, ef það er ekki minna maus að sinna vinnu frá 9 til 5 (17 fyrir þá sem geta ómögulega notast við eðlilega 12 tíma klukku).
En öllum heilsast vel.
Nóg í bili.
...

laugardagur, 27. september 2008

Einn...

...tveir!
Virkar þetta ennþá?

mánudagur, 17. mars 2008

Keflið...

...losnaði aðeins. Sjáum til hvort ég næ því alveg af.
Skál!!!

föstudagur, 18. janúar 2008

Fyrstur...

...kemur, fyrstur fær! Allir út á völl!
Það er ekki á hverjum degi sem það losnar sæti í flugvél.